Aston Villa vann hádramatískan og frækinn 2-1 sigur á Arsenal í 15. umferð ensku úrvalsdeildarinnar á Villa Park í dag.

Leikurinn var hin mesta skemmtun og mættu lærisveinar Unai Emery vel undirbúnir gegn besta liði deildarinnar.

David Raya varði frábærlega frá Ollie Watkins snemma leiks og þá varði Emiliano Martínez vel frá Bukayo Saka sem lét vaða með hörkuskoti fyrir utan teig.

Mark var tekið af Eberechi Eze á 22. mínútu vegna rangstöðu á Bukayo Saka í aðdragandanum en fimmtán mínútum síðar fengu gestirnir óvænt högg er Matty Cash tók forystuna fyrir Aston Villa.

Fyrirgjöfin kom frá vinstri, sem varnarmaður Arsenal skallaði aftur fyrir sig og í hlaupaleið Cash sem setti boltann á milli fóta hjá David Raya og í netið.

Staðan í hálfleik 1-0 fyrir Villa. Mikel Arteta gerði breytingar í hálfleik en hann setti Leandro Trossard og Viktor Gyökeres inn í stað Mikel Merino og Eze.

Trossard, eins og svo oft áður, kom Arsenal til bjargar er hann jafnaði metin á 52. mínútu.

Villa-menn töpuðu boltanum og var það Martin Ödegaard sem keyrði fram völlinn, lagði boltann inn á Saka sem kom boltanum í átt að marki. Martínez varði hann út á Trossard sem skaut honum í gegnum varnarmenn Villa og í markið.

Meiri ákefð færðist í leikinn og var erfitt að sjá ekki annað mark koma.

Raya varði meistaralega frá Watkins og fimm mínútum síðar sá Martínez við Ödegaard með heimsklassavörslu.

Donyell Malen gat tryggt Villa sigurinn á 78. mínútu en setti boltann hárfínt framhjá markinu. Þreytan fór aðeins að segja til sín á síðustu mínútum en áfram hélt leit beggja liða að sigurmarki.

Seint í uppbótartímanum voru það heimamenn sem tóku öll stigin eftir ótrúlegar senur. Fyrirgjöfin kom fyrir á Jadon Sancho sem átti skalla í átt að marki. Boltinn datt aftur og aftur fyrir Villa áður en Emi Buendía stýrði honum efst í hægra hornið.

Villa annað liðið til að vinna Arsenal á tímabilinu og er nú í öðru sæti aðeins þremur stgium frá toppliðinu en Manchester City á möguleika á að saxa á forystu Arsenal niður í aðeins tvö stig þegar það tekur á móti Sunderland á Etihad klukkan 15:00.