Spænska stórveldið mun borga 100 milljónir evra fyrir Bellingham en sú upphæð gæti hækkað um nokkrar milljónir á næstu árum ef hann stendur sig vel.

Bellingham mun skrifa undir sex ára samning við Real Madrid sem gildir til ársins 2029.

Real Madrid er þar með að landa heitasta bitanum á markaðnum en Bellingham er 19 ára gamall miðjumaður sem hefur slegið í gegn í þýska boltanum.

Hann er orðinn mikilvægur hluti af enska landsliðinu þrátt fyrir ungan aldur og var frábær á HM í Katar á síðasta ári.

Bellingham var sterklega orðaður við Liverpool en félagið hætti við að kaupa hann út af kostnaðinum sem því fylgdi. Liverpool er núna að ganga frá kaupum á argentínska heimsmeistaranum Alexis Mac Allister fyrir 35 milljónir punda.