Spænski miðvörðurinn Sergio Ramos hefur staðfest að hann hafi spilað sinn síðasta leik fyrir mexíkóska félagið Monterrey en skórnir fara þó ekki beint upp í hillu.
Ramos, sem er 39 ára gamall, spilaði sinn síðasta leik í 3-2 tapi gegn Toluca í úrslitakeppni deildarinnar í nótt.
Spánverjinn kvaddi félagið á samfélagsmiðlum eftir leikinn en hann sagðist vonsvikinn að hafa ekki getað gefið stuðningsmönnum annan úrslitaleik.
„Við erum leiðir en förum héðan með hreina samvisku vitandi það að við gáfum allt á vellinum. Núna er tíminn til að læra, koma sér aftur á fætur og skilja að þetta er partur af fótboltanum. Stærsta eftirsjáin er að geta ekki gefið stuðningsmönnunum annan úrslitaleik því enginn á það meira skilið en þeir. Ég verð ykkur ávalt þakklátur fyrir stuðninginn,“ sagði Ramos á samfélagsmiðlum en hann staðfesti einnig í viðtali eftir leikinn að þetta hafi verið síðasti leikur hans með Monterrey.
Ramos ætlar ekki að hætta í fótbolta og vill að minnsta kosti taka eitt ævintýri í viðbót en hann mun nú leggjast undir feld, skoða alla möguleika og greina síðan frá ákvörðun sinni á næstu vikum.
Varnarmaðurinn er einn sá besti í sögunni og vann fjölda titla með Real Madrid, Paris Saint-Germain og spænska landsliðinu.
Athugasemdir
