„Þetta er bara yndislegt. Þetta verður ekki betra. Þvílíka ruglið að taka þennan riðil og pakka honum saman. Þetta er eini riðillinn sem var með fjögur lið á Evrópumótinu. Þetta var ótrúlega erfiður riðill og það voru ekki margir sem höfðu trú á því að við myndum vinna þennan riðil," sagði Jóhann Berg Guðmundsson eftir 2-0 sigur Íslands gegn Kósóvó í kvöld.

Jóhann Berg var á skotskónum, annan leikinn í röð og skoraði hann seinna mark Íslands og gulltryggði farseðilinn til Rússlands næsta sumar.

„Þetta er stærra (en að komast á Evrópumótið í Frakklandi) og það voru margir sem höfðu kannski ekki trú á því að við myndum gera þetta sama aftur. Sérstaklega eftir að við fengum svona erfiðan riðil og það voru ekki margir sem trúðu því að við myndum vinna þennan riðil.

Jóhann Berg hrósaði starfsfólkinu í kringum landsliðið í hástert, sem og stuðningsmönnum Íslands.

„Þetta er ótrúlegt lið og það er ótrúleg umgjörð í kringum þetta. Allt starfsfólkið sem leggur mikla vinnu á sig í þetta og þau eiga þökk skilið fyrir allt sem þau gera fyrir okkur og stuðningsmennirnir fyrir að vera með okkur í þessu. Þessi heimavöllur hjá okkur er magnaður. Þetta er yndislegt."

Gylfi Þór Sigurðsson kom Íslendingum yfir undir lok fyrri hálfleiks og var það mikill léttir fyrir alla.

„Þetta fyrsta mark var gríðarlega mikilvægt. Þeir voru mikið með boltann. Þeir eru flottir í fótbolta og erfitt að brjóta þá niður. Fyrsta markið hjá Gylfa var mjög mikilvægt og þetta seinna mark kláraði leikinn. Tilfinningin er bara ólýsanleg."

Jóhann Berg var pollrólegur í viðtalinu og virtist ekki á honum að hann hefði skorað mark sem skaut Íslandi á heimsmeistaramótið í fótbolta, fámennast allra landa í sögunni. Það var þó ástæða fyrir því.

„Ég er búinn að taka þetta allt saman út eftir leik og inn í klefa. Við erum búnir að ná okkur aðeins niður fyrir kvöldið en við eigum eftir að skemmta okkur vel í kvöld."