Hann hefur verið algjör lykilmaður fyrir þjóð sína í undankeppni fyrir HM og skoraði meðal annars sigurmörkin í leikjum gegn Líberíu og Namibíu sem fóru fram í nóvember 2023.

Það gerðist svo í maí 2024 að FIFA tilkynnti að Nsue væri í raun ólöglegur leikmaður fyrir landslið Miðbaugs-Gíneu, útaf ófullnægjandi pappírsvinnu frá því þegar hann ákvað að spila fyrir þjóðina. FIFA samþykkti aldrei þessi landsliðaskipti.

Nsue fæddist og ólst upp á Spáni og var lykilmaður upp yngri landsliðin, með 20 mörk í 51 leik. Hann tók þó ekki skrefið upp í A-landsliðið og kaus í staðinn að spila fyrir Miðbaugs-Gíneu.

Þetta mál vekur mikla athygli vegna þess að FIFA dæmdi Líberíu og Namibíu 3-0 sigra í tapleikjum þeirra gegn Miðbaugs-Gíneu, en aðhafðist ekkert annað. Aðrar þjóðir riðilsins fengu úrslitum sínum gegn Miðbaugs-Gíneu ekki breytt.

Það var í mars á þessu ári sem Nsue fékk opinbera leikheimild frá FIFA til að spila með landsliði Miðbaugs-Gíneu. Eftir þá ákvörðun ákvað Miðbaugs-Gínea að áfrýja upprunalegri niðurstöðu FIFA til Alþjóðaíþróttadómstólsins, CAS.

Í stjórnarskrá Miðbaugs-Gíneu segir að allir þegnar sem eiga móður eða föður frá landinu séu sjálfkrafa ríkisborgarar frá fæðingu. Stjórnendur landsliðsins telja því að Nsue hafi aldrei þurft leikheimild til að spila fyrir þjóð sína og vilja láta breyta úrslitunum aftur til baka.

CAS skoðaði málið en ákvað að vísa því frá vegna ófullnægjandi pappírsvinnu. Miðbaugs-Gínea nefndi FIFA sem aðila í málinu en gleymdi að hafa landslið Líberíu og Namibíu með. CAS telur það grundvallaratriði að hafa Namibíu og Líberíu einnig með í málinu og vísaði því frá.

Þetta er gríðarlega sárt fyrir Miðbaugs-Gíneu sem leit mjög vel út í baráttunni um sæti fyrir HM. Núna eru möguleikar þjóðarinnar á því að komast til Bandaríkjanna litlir sem engir, en þetta hefði verið fyrsta heimsmeistaramótið sem Miðbaugs-Gínea tekur þátt í.

FIFA sendi röksemdafærslu til CAS vegna málsins og benti meðal annars á að fótboltasambandið hafi farið mjög vægt í málin með því að dæma aðeins tvo leiki sem tapaða fyrir Miðbaugs-Gíneu. FIFA hefði meðal annars getað dæmt Miðbaugs-Gíneu alfarið úr leik í undankeppninni vegna reglubrotanna.

Nsue var markahæsti leikmaður Afríkumótsins 2023 og hefur borið fyrirliðaband Miðbaugs-Gíneu. Faðir hans er frá Miðbaugs-Gíneu en móðirin er spænsk.

   14.02.2024 23:40

Markahæsti leikmaður Afríkukeppninnar í ótímabundið agabann