Þór tryggði sig upp í Bestu deild karla eftir 11 ára fjarveru frá efstu deild karla. Þeir fóru með sigur af hólmi á AVIS-vellinum eftir 1-2 sigur á Þrótti og var það uppaldi Þórsarinn, Ingimar Arnar Kristjánsson, sem skoraði sigurmark Þórsara.
„Síðan ég kom í meistaraflokk, þá er þetta búið að vera svona sjöunda sæti og einhvers staðar þar í kring. Í fyrra byrjuðum við mjög vel á undirbúningstímabilinu en það fór ekki eins og við ætluðum. Við erum búnir að vera mjög góðir í sumar og þá sérstaklega í seinni umferðinni."
Lestu um leikinn: Þróttur R. 1 - 2 Þór
Þór hafnaði í 10. sæti Lengjudeildarinnar í fyrra og var það mikið vonbrigðatímabil. Það hefur því eitthvað breyst frá því og til dagsins í dag.
„Ég veit ekki. Við fengum allavega mjög góða leikmenn inn, útlendinga, heimamenn og Íslendinga. Við erum bara með mjög gott lið og held að við höfum bara farið að trúa því og æfðum almennilega í allan vetur og það skilaði sér."
Ingimar Arnar skoraði sigurmarkið eftir hornspyrnu og má segja að það hafi verið svokallað iðnaðarmark.
„Ég man ekki einu sinni eftir þessu. Var þetta eftir hornspyrnu? Ég man það ekki alveg. Hann datt svo bara fyrir mig og datt svo skemmtilega í samskeytin. Maður fer svona í hálfgert 'blackout' og hleypur til stuðningsmannanna."
Viðtalið í heild má nálgast í spilaranum að ofan.
