AC Milan tók á móti Atalanta í nágrannaslag í kvöldleiknum í ítalska boltanum og úr varð mikil skemmtun. Gestirnir náðu forystunni strax á sjöundu mínútu þegar boltinn barst til Éderson eftir atgang í vítateignum og kláraði hann með hnitmiðuðu skoti.

Davide Zappacosta tvöfaldaði forystuna þegar hann komst innfyrir vörnina og gerði Nikola Krstovic mjög vel að koma boltanum á Zappacosta sem skoraði af stuttu færi.

Milan átti engin svör og setti Giacomo Raspadori þriðja markið með frábæru skoti í upphafi síðari hálfleiks.

Heimamenn voru þó ekki búnir að gefast upp og blésu til sóknar. Þeim tókst þó ekki að minnka muninn fyrr en alltof seint, þegar Strahinja Pavlovic skallaði aukaspyrnu frá Samuele Ricci í netið.

Dómarinn bætti sex mínútum við og fiskaði varamaðurinn Christopher Nkunku vítaspyrnu í uppbótartímanum. Hann steig sjálfur á punktinn og skoraði örugglega.

Milan fékk færi til að gera ótrúlegt jöfnunarmark eftir aukaspyrnu á 97. mínútu en Lorenzo Colombo átti lélegan skalla að marki úr mjög góðu færi og svo vildu heimamenn fá dæmda vítaspyrnu fyrir hendi en fengu ekki, svo lokatölur urðu 2-3.

Þetta er annað tapið í röð hjá Milan svo stórveldið er í bráðri hættu á að missa óvænt af meistaradeildarsæti. Liðið er aðeins búið að ná í fjögur stig af síðustu fimmtán mögulegum í Serie A.

Það eru aðeins tvær umferðir eftir og er Milan í harðri baráttu um síðasta meistaradeildarsætið. Lærlingar Max Allegri eru jafnir Roma á stigum en sitja sæti fyrir ofan þökk sé sigri í innbyrðisviðureign.

Atalanta er á sama tíma búið að tryggja sér sjöunda sæti deildarinnar sem gæti gefið liðinu þátttökurétt í Sambandsdeildina í haust, ef Inter vinnur ítalska bikarinn á miðvikudagskvöldið.

Smelltu hér til að kaupa áskrift að Livey