Baldur í leiknum í kvöld.
,,Mér leið gríðarlega vel þegar ég spilaði hérna og líður alltaf vel þegar ég kem hérna með KR. Það var virkilega gaman að setja tvö í dag og sigra leikinn," sagði Baldur Sigurðsson miðjumaður KR sem var frábær í 2-0 sigri á Keflavík í kvöld og skoraði bæði mörkin.
,,Þegar við náum að skora seinna markið getum við farið að beita meira skyndisóknum og það er auðveldara að halda honum svo við róuðumst aðeins. Það er alltaf viss pressa að vera með eitt mark og eiga á hættu að fá eitt í bakið."
,,Sérstaklega í byrjun móts þegar menn eru að finna sig. Seinni hálfleikur var betri af okkar hálfu enda náðum við að laga hluti sem okkur fannst að í fyrri hálfleik."
Baldur var á miðjunni með Jónasi Guðna Sævarssyni en Brynjar Björn Gunnarsson var ekki með.
,,Þeir ellefu sem byrja verða að standa sig og ég og Jónas spiluðum mikið saman á miðjunni hjá Keflavík á sínum tíma. Okkur líður vel saman og erum góðir vinir og þekkjum hvorn annan mjög vel."
