Jóhann Kristinn Gunnarsson, þjálfari Þróttar, var eðlilega svekktur eftir 1-2 tap liðsins gegn nýliðum Grindavíkur/Njarðvíkur í 4. umferð í Bestu deild kvenna í Laugardalnum í kvöld. Hann sagði gestina hafa verið sterkari aðilann, sérstaklega í fyrri hálfleik.
„Það eru náttúrulega hroðaleg vonbrigði og sársvekktur að hafa tapað á heimavelli. Það er eitthvað sem við ætluðum ekki að gera. Þannig það eru fyrstu viðbrögð,“ sagði Jóhann eftir leik.
Lestu um leikinn: Þróttur R. 1 - 2 Grindavík/Njarðvík
„Þær voru bara miklu ákveðnari og tóku fyrri hálfleikinn bara í nefið. Við bara einhverra hluta vegna náðum ekki að matcha það. Þannig að þeirra orka í fyrri hálfleik skóp þennan sigur.“
Jóhann hrósaði nýliðunum fyrir frammistöðuna en vildi ekki gera lítið úr eigin leikmönnum þrátt fyrir svekkelsið.
„Svo er þetta bara vel spilandi lið, þær voru bara flottar, það er ekki hægt að taka neitt af þeim.“
„Ég ætla ekki að fara tala liðið mitt niður. Ég ætla bara að hrósa Grindavík fyrir frábæra frammistöðu og verðskuldaðan sigur í kvöld.“
Þróttur á inni tvo leikmenn þær Freyju Karín og Björgu vegna meiðsla en Jóhann segir óljóst hvenær þær snúa aftur.
„Við bara vitum það ekki, það bara kemur í ljós en við erum alveg með nógu góða leikmenn í það að vinna hvað sem er. Ég er mjög ánægður með hópinn og mér finnst ekkert vanta. Við eigum bara að gera betur.“
Næsta verkefni Þróttar er stórleikur gegn Breiðabliki í Mjólkurbikarnum á laugardag og sagði Jóhann fókusinn fljótt fara þangað.
„Bara mjög vel, ég ætla bara að vera svekktur í kvöld og svo förum við að spá í bikarinn sem er á laugardaginn og Breiðablik.“
Sjáðu viðtalið í heild í spilaranum hér að ofan.
