Kevin de Bruyne, besti miðjumaður í heimi, segir að það sé ekki hægt að ætlast til þess að Belgía sé í samkeppni við landslið á borð við Frakkland og Ítalíu.
Belgía er með marga frábæra leikmenn - svokallaða gullkynslóð - og hefur verið í efsta sæti heimslistans en hefur aldrei tekist að vinna neitt.
Landslið Belgíu þurfti nýverið að sætta sig við fjórða sæti í Þjóðadeildinni. Eftir að keppni lauk þar, þá var De Bruyne ekki hinn hressasti né bjartsýnasti.
„Við erum 'bara' Belgía. Það vantaði Eden Hazard og Romelu Lukaku í dag (í leiknum um þriðja sætið gegn Ítalíu). Við verðum að vera raunsæir um liðið sem við vorum með í dag."
„Ítalía, Frakkland og Spánn eru með 22 leikmenn úr hæsta gæðaflokki til að velja úr. Við erum ekki með það," sagði De Bruyne við HLN.
Besti árangur Belgíu á síðustu árum var þriðja sætið á HM 2018. Ná þeir að bæta þann árangur áður en þeirra bestu leikmenn leggja skóna á hilluna?
Athugasemdir