Á þriðja tug fjölmiðla í Bosníu hafa fjallað um stuðninginn frá Íslandi, þar á meðal vefsíðan ilijas.net.
Yfir 20 fjölmiðlar í Bosníu hafa undanfarna daga fjallað um íslensku fótboltaakademíuna Snerpu og stuðning hennar við íþróttaiðkun barna hjá SOS Barnaþorpunum í Bosníu og Hersegóvínu.
Ný umfjöllun hefur bæst við á hverjum degi síðustu daga og er augljóslega mikill áhugi í Bosníu á þessum stuðningi frá Íslandi. Um er að ræða fjölmiðla af ýmsum tegundum, meðal annars blöð og sjónvarpsstöðvar.
Greint var frá samstarfinu í ágúst en það felur í sér að hluti af því fjármagni sem kemur inn í gegnum verkefni Snerpu rennur í stuðning við íþróttaiðkun barna í Bosníu.
„Með þessum stuðningi vill akademían ekki aðeins styðja við ungt íþróttafólk hér heima, heldur einnig ungt íþróttafólk sem býr ekki við sömu tækifæri annarsstaðar í heiminum," sagði í tilkynningu í ágúst en SOS Barnaþorpin í Bosníu og Hersegóvínu eru með um 190 börn á sínu framfæri,
Stofnandi Snerpu er Mirza Hasecic sem er fæddur í Sarajevó en alinn upp á Íslandi. Faðir Mirza er Nihad Hasecic og hefur starfað sem þjálfari hér á landi í yfir 27 ár, meðal annars hjá Sindra, Grindavík og Keflavík. Hann kemur einnig að starfsemi Snerpu sem og goðsögnin Milan Stefán Jankovic.
Samstarf Snerpu við SOS Barnaþorpin felur í sér að hluti af því fjármagni sem kemur inn í gegnum æfingagjöld hjá Snerpu rennur í stuðning við íþróttaiðkun barna og ungmenna hjá SOS Barnaþorpunum í Bosníu. Með þessum stuðningi vill Mirza ekki aðeins styðja við ungt íþróttafólk hér heima á Íslandi, heldur einnig ungt íþróttafólk sem býr ekki við sömu tækifæri annarsstaðar í heiminum.
Það er til marks um öflugt íþróttastarf hjá SOS Barnaþorpunum í Bosníu að drengjalið SOS barnaþorpsins í Sarajevó stóð uppi sem sigurvegari á Hope for Mundial, heimsmeistaramóti fósturbarna sem fram fór í Póllandi.
Mirza Hasecic hefur leikið með Þrótti Vogum undanfarin ár.
Athugasemdir
