Ekki mikil bjartsýni fyrir leikinn í kvöld

Leikur Íslands og Ísrael verður klukkan 18:45 á Laugardalsvelli í kvöld.

Ísrael er á toppi riðilsins með 4 stig. Ísland er í öðru sæti með 2 stig og á tvo leiki eftir, leikinn í kvöld og útileik gegn Albaníu í september.

Ef Ísland tapar í kvöld er möguleiki strákanna okkar á því að enda í efsta sæti riðilsins, og komast þar með upp í A-deild, horfinn.

Aðeins þrjú lið eru í riðlinum þar sem Rússlandi var meinuð þátttaka vegna innrásarinnar í Úkraínu. Rússar falla sjálfkrafa niður í C-deild og hin liðin því örugg.

Um 55% lesenda Fótbolta.net spá því að Ísland tapi í kvöld og missi þar með af möguleika á efsta sætinu.