Arne Slot var kátur eftir 2-0 sigur Liverpool gegn Brighton í ensku úrvalsdeildinni í dag.
Englandsmeistararnir eru komnir aftur á sigurbraut eftir slæman kafla undanfarnar vikur. Þeir lögðu Inter að velli í miðri viku eftir að hafa gert jafntefli við nýliða Leeds United og Sunderland í síðustu tveimur umferðum þar á undan.
„Dugnaður og vinnusemi skópu þennan sigur, þetta var mjög erfiður leikur fyrir okkur. Sem betur fer tókst okkur að hafa betur. Í fyrsta sinn í margar vikur leið mér eins og heppnin væri með okkur í liði. Við fengum 3 mörk á okkur um daginn í leik þar sem andstæðingarnir (Sunderland) fengu færri færi heldur en Brighton fékk í dag," sagði Slot.
„Þeir áttu mjög góða kafla gegn okkur og ég var hrifinn af því hvernig þeir spiluðu, en þeir höfðu viku til að undirbúa sig fyrir leikinn á meðan við fengum bara þrjá daga. Við áttum skilið að hafa smá heppni með okkur, strákarnir börðust mjög vel í dag. Þeir sýndu frábært hugarfar á erfiðum tímapunkti fyrir okkur þar sem er mikið af leikjum í bland við meiðslavandræði og annað."
Hugo Ekitike skoraði bæði mörkin í sigrinum og hrósaði Slot honum og Florian Wirtz að leikslokum.
„Hann (Ekitike) skoraði góð mörk og það voru tímapunktar í leiknum þar sem hann hreif mig mjög mikið. Það er mjög gott að sjá að hann og fleiri sem komu í sumar eru að gera vel.
„Hvernig Florian (Wirtz) höndlar boltann er magnað, hann er rosalega yfirvegaður. Hann er stöðugt að bæta sig, hann er að verða sterkari og sterkari."
Slot hrósaði einnig Mohamed Salah að leikslokum og segir að það sé allt í góðu á milli þeirra eftir einlægt spjall. Salah byrjaði á bekknum en var skipt inn í fyrri hálfleik vegna meiðsla Joe Gomez.
„Það var auðveld ákvörðun að hafa hann með í hópnum, hann reyndist mikilvægur fyrir okkur í dag. Það sem við ræddum verður áfram á milli okkar. Það verður erfitt að missa hann í Afríkumótið, vonandi fáum við einn eða tvo aftur úr meiðslum."
Athugasemdir
