Milos segir að það sé alltaf gott að vinna KR, hvort sem það er í æfinga- eða keppnisleik.
Milos Milojevic, þjálfari Víkings R., var ánægður með góðan sigur sinna manna á KR í Lengjubikarnum fyrr í kvöld.
Milos vildi þó ekki gera of mikið úr sigrinum enda aðeins um æfingaleik í æfingamóti að ræða.
Milos vildi þó ekki gera of mikið úr sigrinum enda aðeins um æfingaleik í æfingamóti að ræða.
„Ég er sáttur með sigurinn og spilamennskuna en það er ennþá Lengjubikarsbragur á þessari spilamennsku, leikurinn var aðeins að æsast upp að óþörfu en þegar maður vinnur KR 3-1 þá er maður ánægður hvort sem það er æfingaleikur eða ekki," sagði Milos.
„Það er mjög gott að vera með sterka sóknarlínu en ekki gleyma að ég er líka með Andra og Stebba Páls það er það sem ég sagði við strákana, þeir sem komu inn voru gríðarlega öflugir og þannig vil ég hafa það, samkeppni fyrir hverja einustu stöðu. Við þurfum að hafa breidd ef við ætlum að vera í toppbaráttu í sumar."
Víkingar eru búnir að vinna fjóra leiki af fjórum í Lengjubikarnum og er Milos mjög ánægður með það og segir að það hjálpi sjálfstraustinu.
„Þessir sigrar eru ekkert að telja þegar það kemur að alvöru keppninni en að sjálfsögðu hjálpar þetta sjálfstraustinu. Það er komið smá sjálfstraust í liðið en við erum ekkert að missa okkur, það verður enginn meistari í apríl."
Milos er búinn að vera í útlöndum á þjálfaranámskeiði og fer aftur út í páskafríinu.
