Davíð Smári: Að hafa hugrekkið til að spila gegn besta liði landsins

Hvað er það helsta jákvæða sem þú tekur úr þessum leik?

„Að þora að spila, að hafa hugrekkið til að spila og reyna að spila á milli lína gegn besta liði landsins. Það er helst það sem ég tek út úr þessu. Við komum okkur ekki í nægilega góðar stöður á síðasta þriðjungi en við náðum samt að halda helling í boltann. Við komum okkur inn á síðasta þriðjung en náðum ekki að skapa mikið þar. Markið sem við skorum er stórglæsilegt og ég er mjög sáttur með liðið mitt, algjörlega."

Vestri jafnaði metin í fyrri hálfleik en fékk strax mark á sig tveimur mínútum eftir það.

„Auðvitað skapa þeir sér urmul af færum en mér finnst mörkin sem þeir skora í ódýrari kantinum."

„Við erum bara rétt að byrja. Við erum farnir að spila fótbolta en það vantaði aðeins upp á það í byrjun móts. Við erum að vinna í því að laga það."

Þetta var annar heimaleikur Vestra í sumar en báðir heimaleikirnir hafa farið fram í Laugardalnum. Vonast er til að liðið geti spilað heima á Ísafirði gegn Stjörnunni 2. júní næstkomandi.

„Hvenær sem við snúum heim, þá verður það vissulega mjög gott. Hvenær það verður, það veit ég ekki. Ég reyni að spá sem minnst í því. Það er bara næsti leikur og hvar sem hann er spilaður, þá gerum við okkar besta. Ég vona að allir sem standi að vallarmálum á Ísafirði séu líka að gera sitt allra besta," sagði Davíð Smári.

Hægt er að sjá viðtalið í heild sinni í spilaranum hér að ofan.