Solskjær nú talinn líklegastur til að missa starfið

Fjöldi veðbanka á Bretlandseyjum telja líklegast núna að Ole Gunnar Solskjær, stjóri Manchester United, verði næsti stjórinn í ensku úrvalsdeildinni til að láta af störfum.

Steve Bruce lét af störfum í morgun, eitthvað sem kemur engum á óvart.

Ef United tapar gegn Atalanta í Meistaradeildinni í kvöld verður ansi erfitt fyrir liðið að komast í útsláttarkeppnina. United er svo að fara að mæta Liverpool, Tottenham, Manchester City, Watford, Chelsea og Arsenal í næstu sex úrvalsdeildarleikjum.

Athygli vekur að Claudio Ranieri er í öðru sæti á eftir Solskjær á listum yfir næsta stjóra sem gæti misst starfið. Ranieri er nýtekinn við Watford en eigendur félagsins hika ekki við að reka stjórann ef þeir eru óánægðir með gengið.