Theodór Ingi kom inn af bekknum og setti þrennu á aðeins átta mínútum
Grótta er komin áfram
Fylkir og Grótta eru komin áfram í 3. umferð Mjólkurbikars karla en Fylkismenn unnu nokkuð þægilegan sigur á KV meðan Grótta vann nauman sigur á 4. deildarliði Úlfanna.
Fylkir, sem varð Lengjubikarmeistari á dögunum, fór með þriggja marka forystu inn í hálfleikinn er liðið fékk KV í heimsókn á tekk-völlinn í Árbæ.
Benedikt Daríus Garðarsson og Bjarki Steinsen Arnarsson skoruðu með tveggja mínútna millibili áður en Guðfinnur Þór Leósson bætti við þriðja nokkrum mínútum síðar.
Á 68. mínútu kom hinn ungi og efnilegi Theodór Ingi Óskarsson inn af bekknum hjá Fylki. Sá stimplaði sig rækilega inn með þrennu á aðeins átta mínútum.
Fyrsta markið gerði hann á 73. mínútu með því að leika á tvo varnarmenn og setti hann í hornið. Annað markið kom þremur mínútum síðar og fullkomnaði hann síðan þrennuna á 81. mínútu er hann slapp inn fyrir eftir sendingu frá Nikulási Val Gunnarssyni, sem var að leggja upp annað mark sitt eftir að hafa komið inn á sem varamaður á sama tíma og Theodór.
Öruggt hjá Fylkismönnum sem eru komnir áfram í þriðju umferð bikarsins.
Grótta marði 2-1 sigur á Úlfunum á Vivaldi-vellinum á Seltjarnarnesi.
Eftir markalausan fyrri hálfleik var það Alexander Emil Stefánsson sem kom heimamönnum í Gróttu á bragðið þegar tæpar tvær mínútur voru liðnar af síðari.
Úlfarnir voru ekki lengi að svara. Hektor Orri Ingimarsson jafnaði á 50. mínútu en þremur mínútum síðar gerði Elmar Freyr Hauksson markið sem skaut Gróttu áfram í næstu umferð.
Úrslit og markaskorarar:
Fylkir 6 - 0 KV
1-0 Benedikt Daríus Garðarsson ('30 )
2-0 Bjarki Steinsen Arnarsson ('32 )
3-0 Guðfinnur Þór Leósson ('37 )
4-0 Theodór Ingi Óskarsson ('73 )
5-0 Theodór Ingi Óskarsson ('76 )
6-0 Theodór Ingi Óskarsson ('81 )
Lestu um leikinn
Grótta 2 - 1 Úlfarnir
1-0 Alexander Emil Stefánsson ('47 )
1-1 Hektor Orri Ingimarsson ('50 )
2-1 Elmar Freyr Hauksson ('53 )
Grótta - Úlfarnir
Fylkir - KV
Athugasemdir
