Tveimur fyrstu leikjum dagsins er lokið í efstu deild ítalska boltans þar sem Lautaro Martínez fyrirliði Inter skoraði bæði mörk leiksins gegn nýliðum Pisa.
Inter átti dapran leik gegn Pisa en gæðin í Lautaro skiptu sköpum þar sem hann skoraði bæði mörkin í síðari hálfleik. Inter átti aðeins þrjár marktilraunir sem hæfðu rammann í leiknum.
Inter er í þriðja sæti eftir sigurinn, með 27 stig eftir 13 umferðir. Pisa er í fallsæti með 10 stig.
Þórir Jóhann Helgason sat þá allan tímann á bekknum er Lecce nældi sér í dýrmæt stig gegn Torino.
Medon Berisha lagði tvö mörk upp með tæplega þriggja mínútna millibili í fyrri hálfleiknum. Fyrra markið lagði hann upp fyrir Lassana Coulibaly og það seinna fyrir Lameck Banda.
Torino fékk færi til að minnka muninn áður en Che Adams setti boltann í netið snemma í síðari hálfleik. Besta færið fengu gestirnir í uppbótartíma venjulegs leiktíma þegar Kristjan Asllani brenndi af vítaspyrnu. Heimamenn í Lecce vörðust vel og skópu 2-1 sigur.
Lecce fer upp úr fallsæti með þessum sigri og er með 13 stig, einu stigi á eftir Torino.
Pisa 0 - 2 Inter
0-1 Lautaro Martinez ('69 )
0-2 Lautaro Martinez ('83 )
Lecce 2 - 1 Torino
1-0 Lassana Coulibaly ('20 )
2-0 Lameck Banda ('22 )
2-1 Che Adams ('57 )
2-1 Kristjan Asllani ('91 , Misnotað víti)
Athugasemdir
