Óskar er uppalinn KR-ingur, var leikmaður liðsins á sínum tíma, þjálfaði yngri flokka þar og er stuðningsmaður félagsins.

„Ég ólst upp 20 metrum frá KR-svæðinu, eyddi öllum mínum æskuárum hér og myndaði gríðarlega sterk tengsl við félagið líkt og margir jafnaldrar mínir og þúsundir annarra sem eru KR-ingar í gegn. Þegar mér bauðst þetta tækifæri þá þurfti ég ekki að hugsa mig lengi um."

„Það var alltaf stefnan að koma aftur í Vesturbæinn og leggja mitt á vogarskálarnar til að gera félagið eins gott og það getur orðið. Það er gríðarlegur kraftur í félaginu en kannski þurfa hlutirnir að vera aðeins skýrari. Vonandi get ég hjálpað til með það."

KR er í alvöru lægð, en markmiðið með ráðningunni er að koma félaginu aftur í fremstu röð, en karlaliðið er í bullandi fallbaráttu í Bestu deildinni. Á sama tíma er kvennaliðið að berjast um að komast upp úr 2. deild. Óskar ætlar að endurvekja hugsunina um stórveldið KR.

„Við viljum að KR sé í fremstu röð í meistaraflokki karla, meistaraflokki kvenna og í yngri flokkunum. Við viljum að KR sé félag sem aðrir geti tekið sér til fyrirmyndar og horft upp til. Að fólk sé stolt að tengjast KR. Við þurfum á einhvern hátt að endurvekja þessa hugsun um KR og KR-inginn og styrkja þá hugmynd. Í því felst að starfið sé metnaðarfullt og gjöfult, líka fyrir þá sem koma hingað og vilja vera félagsmenn."

„Við munum vinna dag og nótt til að gera félagið eins gott og það verður. Það mun enginn geta sagt að við höfum ekki lagt okkur fram. Ég lofa því," segir Óskar Hrafn.