Það var stórleikur í 2. deild í gær þar sem Selfoss vann 2-1 sigur á Víkingi Ólafsvík og náði þar með níu stiga forystu á toppi deildarinnar.
Lestu um leikinn: Selfoss 2 - 1 Víkingur Ó.
Ólafsvíkingar voru allt annað en sáttir þegar mark var dæmt af Birni Axel Guðjónssyni þegar hann skallaði boltann í netið þegar um stundafjórðungur var til loka venjulegs leiktíma.
Björn Axel mótmælti dómnum og fékk gult spjald fyrir það. Hann verður því í banni vegna uppsafnaðra áminninga þegar Víkingur fær Reyni Sandgerði í heimsókn um næstu helgi.
Boltinn fór greinilega af varnarmanni Selfyssinga áður en Björn Axel kom boltanum í netið en rangstaða var dæmd. Brynjar Kristmundsson þjálfari Víkings var afar ósáttur eftir leikinn.
„Mark sem við skorum sem er dæmt af vegna rangstöðu þar sem boltinn fer af andstæðing, það er mjög dýrt spaug í svona leik," sagði Brynjar.
„Ég fékk útskýringu frá honum eftir leik. Fyrst að okkar maður hoppar upp með Selfyssingnum þá er það snerting. Ég hef aldrei heyrt þetta áður, ég þarf að kíkja í reglubókina, maður er alltaf að læra eitthvað nýtt."
„Ég veit ekki hvenig það yrði orðað. Hversu mikið þarf hann að reyna við boltann, þetta er bara snerting frá Selfyssing á okkar mann og hann skorar. Ég verð að treysta því að hann sé með reglurnar á hreinu en ég set spurningamerki við þetta," sagði Brynjar að lokum.
https://t.co/cGwmPGCdnu 74:50. Ótrúleg ákvörðun. Svo fær maður gult spjald og þ.a.l. bann í næsta leik fyrir að benda á vitleysuna. https://t.co/1GghizmaXK
— Björn Axel Guðjónsson (@bjorn_axel) August 1, 2024
