England: Dýrmætur sigur Southampton þéttir pakkann

Carlos Jonas Alcaraz gerði eina mark leiksins er Southampton hafði betur í jöfnum fallbaráttuslag gegn Leicester City.

Southampton var sterkari aðilinn í fyrri hálfleik og misnotaði James Ward-Prowse vítaspyrnu skömmu áður en fyrsta mark leiksins leit dagsins ljós. 

Danny Ward gerði vel að verja frá Ward-Prowse en honum tókst ekki að koma í veg fyrir markið sem Alcaraz skoraði nokkrum mínútum síðar.

Bæði lið fengu fín færi til að bæta mörkum við leikinn en boltinn rataði ekki í netið og reyndist þetta eina mark leiksins. Miðvörðurinn Harry Souttar verður eflaust svekktastur allra eftir að hafa klúðrað dauðafæri fyrir Leicester á síðustu sekúndum leiksins.

Lokatölur urðu því 1-0 og er Southampton búið að jafna hin tvö botnliðin á stigum. Southampton, Everton og Bournemouth eiga öll 21 stig eftir 25 umferðir, einu stigi á eftir Leeds, tveimur stigum eftir West Ham og þremur eftir Leicester.

Fallbaráttupakkinn er gríðarlega þéttur þar sem aðeins sex stig skilja níu neðstu lið deildarinnar að.