Lars Lagerback.
Lars Lagerback, landsliðsþjálfari Íslands, segist hafa fylgst með Guðlaugi Victori Pálssyni að undanförnu en hann er nýliði í landsliðshópnum fyrir komandi leiki gegn Kýpur og Noregi.
,,Ég hef séð nokkra leiki í sjónvarpinu en ég hef ekki heimsótt hann. Hann er að standa sig vel. Það er alltaf erfitt þegar að lið eru í vandræðum eins og þeir eru. Ég kunni vel við hann þegar hann kom inn í hópinn í vináttuleik á sínum tíma," sagði Lars.
,,Hann hefur hæfileika og getur orðið mjög góður. Ég held að hann sé fæddur árið 90 og ég vona að hann eigi bjarta framtíð fyrir höndum. Það er samt ekki ástæðan fyrir því að hann er í hópnum, það er af því að hann er búinn að standa sig vel í Hollandi."
Níu leikmenn íslenska liðsins eru einungis einu gulu spjaldi frá því að fara í leikbann en Lars vill að leikmenn fari af fullum þunga í leikinn gegn Kýpur.
,,Ég held að þú getir ekki sagt leikmönnum að passa sig eða hugsa um næsta leik. Þeir þurfa að fara af 100% krafti en þetta er spurning um að fá ekki á sig heimskulegar aukaspyrnur og gul spjöld. Við tölum alltaf um það þegar við ræðum varnarleikinn. Ef þú þarft að renna þér í tæklingu þá ertu líklega ekki búinn að verjast eins vel og þú hefðir getað gert."
Ísland mætir Kýpur á Laugardalsvelli á föstudag en langt er síðan uppselt varð á þann leik. Lagerback vonast eftir góðum stuðningi þar.
,,Það er yndislegt að það er uppselt. Stuðningurinn var frábær gegn Albaníu og hann gerir mikið fyrir bæði okkur á bekknum sem og leikmennina að fá jákvæðan stuðning. Ég vona að við fáum sama stuðning gegn Kýpur og gegn Albaníu."
Hér að ofan má sjá viðtalið í heild sinni.
