Mourinho verður á bekknum gegn Juventus
Mynd: EPA
Mynd: EPA
Jose Mourinho verður á varamannabekk Roma í stórleiknum gegn Juventus í kvöld þrátt fyrir að hafa verið dæmdur í tveggja leikja bann eftir óvænt tap gegn fallbaráttuliði Cremonese á dögunum.
Mourinho áfrýjaði banninu og gagnrýndi fjórða dómara leiksins í fjölmiðlum. Ítalska knattspyrnusambandið hefur ákveðið að fresta leikbanninu þar til niðurstaða fæst í áfrýjunarmálinu.
Mourinho segist hafa verið að svara ögrun frá fjórða dómaranum og það hafi valdið því að hann var rekinn upp í stúku. Roma birti gögn þess efnis í áfrýjunarmálinu og eru þau gögn til skoðunar. Umrædd gögn eru talin vera hljóðupptaka frá varamannabekk Roma af atvikinu.
Málið fer fyrir áfrýjunardómstól 10. mars og verður ákvörðun tekin í kjölfarið. Verði Mourinho fundinn sekur missir hann af heimaleik gegn Sassuolo 12. mars hið minnsta en gæti einnig misst af nágrannaslagnum gegn Lazio 19. mars.
Sjá einnig:
Mourinho fer í tveggja leikja bann og þarf að greiða stóra sekt
Mourinho heitt í hamsi og ætlar í mál: Á við minnisvandamál að stríða
