Heimir Hallgrímson og Lars Lagerback hafa tikynnt byrjunarliðið sem mætir Liechtenstein í vináttuleik á Laugardalsvelli klukkan 19:30.

Þetta er síðasti leikur Íslands áður en liðið mætir Portúgal í fyrsta leik á EM á þriðjudaginn í næstu viku.

Leikurinn er jafnframt síðasti leikur Lars Lagerback með íslenska landsliðið á Laugardalsvelli.

Byrjunarliðið er ekki ólíkt því sem Ísland notaði lengst af í undankeppni EM. Sverrir Ingi Ingason er í hjarta varnarinnar í fjarveru Kára Árnasonar sem er veikur.

Arnór Ingvi Traustason byrjar á vinstri kantinum en Birkir Bjarnason hefur ekki getað æft undanfarna daga vegna meiðsla. Birkir byrjar þó á bekknum. Frammi verða Alfreð Finnbogason og Kolbeinn Sigþórsson síðan saman.

Hannes Þór Halldórsson er einnig í fyrsta skipti í byrjunarliðinu síðan hann fór úr axlarlið á landsliðsæfingu í október í fyrra.