Bellingham átti stórkostlegt fyrsta tímabil með Real Madrid og vann hann Meistaradeildina og spænsku úrvalsdeildina. Hann er núna á leið á EM með enska landsliðinu þar sem hann er algjör lykilmaður.

Það hefur verið mikið að gera hjá Bellingham á tímabilinu en hann hefur spilað í gegnum sársauka mest allt tímabilið eftir að hann fór úr axlarlið í markalausu jafntefli gegn Rayo Vallecano þann 5. nóvember síðastliðinn.

Fyrir úrslitaleik Meistaradeildarinnar sást hann mikið halda um öxlina og er það augljóst að þetta er vandamál sem er að trufla hann.

Samkvæmt spænska fjölmiðlinum Cadena SER þá hefur sársaukinn aukist talsvert undir lok tímabilsins. Ef það skánar ekkert á næstu vikum þá er enginn annar möguleiki fyrir hann en að gangast undir aðgerð. Ef svo verður, þá verður hann frá í þrjá mánuði í byrjun næsta tímabils.

Það er vonandi fyrir Englendinga að meiðslin munu ekki trufla Bellingham á EM í sumar.