Fótbolti.net

lau 07. mars 2026 09:30

Ívan Guðjón Baldursson

Slot: Næstum alveg eins leikur og síðast

Mynd: EPA

Arne Slot var ánægður með sigur Liverpool á útivelli gegn Wolves er liðin mættust í 16-liða úrslitum enska bikarsins í gærkvöldi.

Liverpool var talsvert sterkari aðilinn en staðan var markalaus í leikhlé. Vinstri bakvörðurinn Andy Robertson var hetjan í seinni hálfleik þar sem hann skoraði og lagði upp.

Þetta var hefndarsigur hjá Liverpool eftir óheppilegt tap á sama leikvangi í miðri viku. Liðin mættust í ensku úrvalsdeildinni og báru Úlfarnir sigur úr býtum þrátt fyrir að Liverpool hafi verið sterkari aðilinn.

„Við sköpuðum meira í kvöld heldur en í leiknum hérna í miðri viku og það er ástæðan fyrir því að við sigruðum," sagði Slot eftir lokaflautið, en Liverpool heimsækir Galatasaray í 16-liða úrslitum Meistaradeildar Evrópu á þriðjudagskvöldið.

„Þetta var nánast alveg eins leikur og fyrir þremur dögum, tölfræðin er næstum því nákvæmlega sú sama, og það er svekkjandi að þeir skori úr eina færinu sem þeir fá í leiknum. Í síðasta leik fengu þeir eitt færi og skoruðu tvö mörk og við fengum aftur mark á okkur í uppbótartíma. Við erum ánægðir að vera komnir í 8-liða úrslitin, núna hefjum við undirbúning fyrir stórleikinn í Istanbúl."

Slot hrósaði Robertson í hástert en hann er orðinn varaskeifa fyrir Milos Kerkez í baráttunni um byrjunarliðssætið í vinstri bakvarðarstöðunni.

„Strákarnir vilja allir spila hvern einasta leik og það er bara ekki hægt. Robbo sinnti vinnunni sinni mjög vel í dag, hann átti virkilega góðan leik. Hann er mjög verðmætur fyrir félagið, þetta er mikill fagmaður sem leggur sig allan fram í hvert einasta sinn sem við þurfum á honum að halda. Hann býr yfir miklum gæðum og er með frábæran persónuleika. Hann er góður varnarlega og mjög rólegur á boltann.

„Á þeim tíma sem ég hef verið við stjórnvölinn hefur hann gefið allt fyrir klúbbinn. Hann elskar félagið og að spila fyrir framan stuðningsmennina."

Slot var einnig spurður út í hinn 17 ára gamla Rio Ngumoha sem fékk tækifæri í fremstu víglínu.

„Hann er mjög sérstakur leikmaður, hann er bara 17 ára gamall og gat haft svona mikil áhrif á leikinn eins og hann gerði í dag. Það er undir honum komið að finna stöðugleika í frammistöðum og sýna gæðin sín í hverjum einasta leik. Þessi frammistaða í kvöld ætti að hjálpa sjálfstraustinu."

Slot sneri sér að lokum að Florian Wirtz sem er kominn aftur eftir meiðsli. Hann fékk að spila síðustu 25 mínútur leiksins.

„Ég er mjög ánægður að vera búinn að fá Florian og fleiri aftur úr meiðslum. Það er eðlilegt að frammistaða leikmanna verði verri þegar það eru alltaf sömu leikmennirnir að spila hvern einasta leik. Andleg og líkamleg þreyta spila stórt hlutverk og koma niður á frammistöðunni innan vallar.

„Það er mjög mikilvægt að fá þessa menn úr meiðslum því það eykur breiddina. Ég get þá haft meiri áhrif á leiki með skiptingum af bekknum og hvílt leikmenn af og til."

		L	U	J	T	ms:	mf:	mun	Stig
1	Arsenal	33	21	7	5	63	26	+37	70
2	Man City	32	20	7	5	65	29	+36	67
3	Man Utd	33	16	10	7	58	45	+13	58
4	Aston Villa	33	17	7	9	47	41	+6	58
5	Liverpool	33	16	7	10	54	43	+11	55
6	Chelsea	33	13	9	11	53	42	+11	48
7	Brentford	33	13	9	11	48	44	+4	48
8	Bournemouth	33	11	15	7	50	50	0	48
9	Brighton	33	12	11	10	45	39	+6	47
10	Everton	33	13	8	12	40	39	+1	47
11	Sunderland	33	12	10	11	36	40	-4	46
12	Fulham	33	13	6	14	43	46	-3	45
13	Crystal Palace	32	11	10	11	35	36	-1	43
14	Newcastle	33	12	6	15	46	49	-3	42
15	Leeds	33	9	12	12	42	49	-7	39
16	Nott. Forest	33	9	9	15	36	45	-9	36
17	West Ham	33	8	9	16	40	57	-17	33
18	Tottenham	33	7	10	16	42	53	-11	31
19	Burnley	33	4	8	21	34	67	-33	20
20	Wolves	33	3	8	22	24	61	-37	17