Michael Owen, fyrrum leikmaður Liverpool, hefur blandað sér í umræðuna um egypska sóknarmanninn Mohamed Salah.
Salah lét Arne Slot og Liverpool heyra það eftir að hafa verið settur á bekkinn í þriðja sinn í röð í gær.
Opnaði hann þar möguleikann á að fara frá Liverpool, en hann segist ekki fá þá virðingu sem hann á skilið hjá Englandsmeisturunum.
Owen, sem var eitt sinn aðalmaður Liverpool, segist vel skilja það sem Salah sé að ganga í gegnum, en að þetta sé ekki rétta leiðin til að gera hlutina.
„Ó, Mo Salah ég get ímyndað mér hvernig þér líður. Þú hefur borið liðið á herðum þér í svo langan tíma og unnið allt sem hægt er að vinna, en þetta er liðsíþrótt og þú getur ekki opinberlega sagt það sem þú sagðir. Þú ferð á Afríkumótið eftir viku.“
„Getur þú ekki bitið í vörina, notið þess að spila fyrir þjóð þína og séð svo hvernig landið liggur þegar þú kemur til baka?“ sagði og spurði Owen á X.
Owen fór til Real Madrid frá Liverpool árið 2004 eftir að hafa verið þeirra besti maður. Hann skorar ekki lengur hátt á vinsældarlistanum hjá stuðningsmönnum Liverpool eftir að hafa gengið í raðir erkifjenda þeirra í Manchester United árið 2009.
Athugasemdir
