Fór meiddur af velli
Genoa 2 - 1 Roma
1-0 Junior Messias ('52 , víti)
1-1 Evan Ndicka ('55 )
2-1 Vitinha ('80 )
1-0 Junior Messias ('52 , víti)
1-1 Evan Ndicka ('55 )
2-1 Vitinha ('80 )
Mikael Egill Ellertsson var á sínum stað í byrjunarliði Genoa sem tók á móti stórveldi AS Roma í ítalska boltanum í dag.
Staðan var markalaus eftir afar bragðdaufan fyrri hálfleik, þar sem heimamenn í Genoa fengu þó besta færið.
Í síðari hálfleik náði Genoa forystunni þegar Junior Messias skoraði úr vítaspyrnu eftir að brotið var á Mikael Agli innan teigs.
Evan Ndicka jafnaði metin skömmu síðar eftir skallatennis í kjölfar hornspyrnu. Staðan hélst jöfn, 1-1, stærstan hluta seinni hálfleiksins en heimamenn í liði Genoa voru hættulegra liðið.
Mikael Egill fór meiddur af velli á 79. mínútu og skoruðu liðsfélagar hans úr innkastinu sem fylgdi. Vitinha kláraði af stuttu færi eftir frábært spil í gegnum vörn Rómverja.
Gestirnir reyndu að svara fyrir sig á lokakaflanum en sköpuðu litla sem enga hættu, svo lokatölur urðu 2-1.
Þetta eru afar dýrmæt stig fyrir Genoa, sem er sex stigum fyrir ofan fallsvæðið. Hins vegar er þetta óheppilegt fyrir meistaradeildarvonir Roma, sem missir fjórða sætið til Como á markatölu.
Athugasemdir
