„Það var auðvitað bara markmiðið (að komast áfram), vinna leikinn og það tókst", sagði Sigurvin Ólafsson þjálfari Þróttara eftir 3-1 sigur gegn Víking Ólafsvík í Mjólkurbikarnum.
Lestu um leikinn: Þróttur R. 3 - 1 Víkingur Ó.
„Ég var í raun mjög ánægður með frammistöðuna allan tíman. Ég var aðeins búinn að kynna mér Víkingana, og sá þá spila um daginn. Ég sá að þetta yrði erfitt verk, þeir eru vel skipulagðir, liggja djúpt til baka og eru vel skipulagðir, og gefa lítið af færum á sér. Þannig ég vissi það svo sem að þetta yrði engin flugeldasýning, sérstaklega í fyrri hálfleik. Þannig það var mjög mikilvægt að ná markinu tiltölulega snemma, svo það yrði ekkert 'panic' ástand. Svo snýst þetta bara um smá þolinmæði, veðra þá svolítið niður og halda í boltann. Þannig þetta æxlaðist og þróaðist rétt og vel," sagði Sigurvin.
Þetta var fyrsti mótsleikur Þróttar á tímabilinu þar sem Lengjudeildin byrjar ekki fyrr en eftir um mánuð.
„Við erum mjög sterkir, mjög fínir, erum 'fit' og spilamennskan er bara fín. Þannig þetta er allt samkvæmt plani," sagði Sigurvin.
Þrótturum var spáð 2. sæti í Lengjudeildinni í síðustu spá sem var birt á vefnum. Sigurvin segist spenntur fyrir þá áskorun að vera álitinn eitt sterkasta lið deildarinnar.
„Það er bara frábær áskorun, og ég tek henni fagnandi. Þróttur á að vera á þeim stað, við þurfum að fagna þeirri tilfinningu, og þeirri áskorun að okkur sé spáð góðu gengi. Frekar en að vera einhverjir 'underdogs' eða brandaralið. Ég hlakka til að takast á við þá áskorun að vera frekar 'favorites' heldur en 'underdog'," sagði Sigurvin.
Sigurður Egill Lárusson kom til liðsins frá Val í vetur, en hann átti virkilega góðan leik fyrir Þrótt í dag.
„Hann er algjör fagmaður eins og allir vita, beint og óbeint þá hækkar hann standardinn hjá félaginu og inn í klefa. Frábær leikmaður, og með marga af þessum frábæru kostum. Hleypur endalaust, gefst aldrei upp og meiðist ekki neitt. Fyrir utan öll hin gæðin þá er þetta bara mikill fengur fyrir okkur," sagði Sigurvin.
Viðtalið má sjá í heild sinni í spilaranum hér fyrir ofan.
