Spánn: Fornals skoraði sitt fyrsta mark í útisigri Betis

Real Betis er komið upp í 6. sæti La Liga á Spáni eftir góðan 2-0 útisigur á Cadiz í kvöld.

Gestirnir gátu ekki beðið um betri byrjun. Brasilíski sóknarmaðurinn Willian Jose skoraði með fallegu skoti úr teignum á 6. mínútu og þá var Nabil Fekir hársbreidd frá því að tvöfalda forystuna um miðjan fyrri hálfleikinn, en Cristian Ledesma varði frábærlega.

Pablo Fornals var að byrja sinn fyrsta leik með Betis frá því hann kom frá West Ham undir lok gluggans og hélt hann upp á það með marki í byrjun síðari hálfleiks.

Cadiz varð betra þegar leið á leikinn en greinilega enn fast í hausnum á þeim að liðið hafi ekki skorað mark í fimmm af síðustu sex leikjum sínum.

Markið kom ekki hjá þeim í kvöld og eru nú sjö klukkustundir liðnar frá síðasta marki. Betis var á meðan að ná í annan útisigur sinn í síðustu ellefu leikjum sínum.

Betis er í 6. sæti með 38 stig en Cadiz í 18. sæti með 17 stig.