Það líður ekki sá dagur að ég lendi ekki á spjalli við fólk sem er að velta fyrir sér hvort það verði ekki örugglega gert frí á Íslandsmótinu í tólf daga í kringum EM, enda virðist almannaálit vera að það sé eina vitið. Ég ræð engu um það en ég vona svo sannarlega að KSÍ hugsi um fótboltasamfélagið á Íslandi í heild og geri hlé á mótinu þannig að allir sem vilja geti farið út til Frakklands og séð að minnsta kosti einn leik með íslenska liðinu. Þarna er ég að tala um algjört hlé í öllum deildum og öllum flokkum, íslenskur fótbolti verði í fríi frá 10-22. júní (ca, fer eftir leikdögum) til að hægt verði að fylgjast með íslenska landsliðinu spila.

Þetta mun ekki hafa stórvægilegar breytingar í för með sér á Íslandsmótinu. Mótið sem slíkt heldur sér alveg. Leikirnir verða að sjálfsögðu áfram 22 hjá hverju liði í efstu deildum karla og 18 í efstu deild kvenna. Það eina sem þarf að gera er að gera smávægilegar breytingar á leikjaniðurröðun, bara í þetta eina skipti. Leikjaniðurröðun á Íslandsmótinu breytist nánast ekkert frá ári til árs en árið 2016 er einstakt í íslenskri knattspyrnusögu. Því skora ég á KSÍ að gera hlé á mótinu á meðan á riðlakeppni EM stendur. Þó að ég hafi fulla trú á að íslenska liðið fari lengra í keppninni þá er skiljanlegt að ekki sé hægt að gera ráð fyrir lengra hlé en í þá tólf daga sem riðlakeppnin fer fram.
Ef að KSÍ gerir ekki hlé og spilað verður í Íslandsmótinu á meðan EM er í gangi er ljóst að aðsókn á þá leiki verður mun minni en venjulega, fjölmiðlaumfjöllun um leikina verður ekki í sama klassa og starfsfólk í kringum liðin og jafnvel leikmenn verða fjarri góðu gamni. Ég get einfaldlega ekki séð hvernig íslenskur fótbolti hagnast á því. Í 4. deild hef ég heyrt dæmi um nánast heilu liðin sem ætla að skella sér á EM. Eiga þau að gefa leiki á Íslandsmótinu af því að leikmenn vilja fara út styðja íslenska landsliðið? Vonandi ekki.

Í Pepsi-deild karla var gert tveggja vikna hlé á mótinu í kringum EM U21 árs landsliða árið 2011 og þvi er búið að sýna fram á að auðveldlega sé hægt að gera hlé í júní þar og finna lausnir á því. Í öðrum deildum er ljóst að færa þyrfti eina til tvær umferðir til ef hlé yrði gert á mótinu í kringum EM. Hafandi spilað í neðri deildunum í mörg ár þá get ég vottað að leikjaálag er ekki eitthvað sem menn hafa kvartað yfir hingað til. Að færa eina eða tvær umferðir í aðra mánuði yfir sumartímann er eitthvað sem ætti að vera leikur einn í öllum deildum. Þá er einnig hægt að hefja mótið viku fyrr, bara í þetta eina skipti.

Í yngri flokkunum er búið að innleiða sumarfrí í júlí og hægt er að færa það fram í júní , bara í þetta eina skipti. Það hentar vel fyrir marga því að reikna má með Frakkland verði vinsælasti staðurinn til að fara í sumarfrí næsta sumar.

Íslenska landsliðið á það skilið að allra augu beinist að því á meðan á EM stendur og KSÍ getur ýtt ennþá frekar undir áhugann á landsliðinu með því að gefa því alveg sviðið í júní. Vonandi komast sem allra flestir Íslendingar út til Frakklands á leik næsta sumar en þeir sem eiga ekki kost á því geta fylgst með af athygli heima, án þess að lenda í árekstri við leiki á Íslandsmótinu.
Áfram Ísland!