Cecilía Rán Rúnarsdóttir var án efa besti leikmaður íslenska landsliðsins í 3-0 tapi gegn heimsmeisturum Spánar fyrr í kvöld.
Lestu um leikinn: Spánn 3 - 0 Ísland
Cecilía varði nokkrum sinnum meistaralega og gerði mjög vel að halda Íslandi inni í leiknum í tæpa klukkustund.
Spánverjar reyndust að lokum alltof sterkir andstæðingar og verðskulduðu fyllilega 3-0 sigur, sem hefði getað vera töluvert stærri ef ekki fyrir markvörslur Cecilíu og ótal klúður Spánverja.
„Það er svolítið skrýtið að segja en mér fannst við standa okkur ótrúlega vel í kvöld. Við vorum óheppnar að fá á okkur fyrsta markið á erfiðum tímapunkti og svo komu hin tvö bara í seinni hálfleik," sagði Cecilía að leikslokum.
„Mér fannst þetta ótrúlega skemmtileg reynsla, þetta er í fyrsta sinn sem ég spila við Spán og þetta eru með bestu leikmönnum í heimi. Mér fannst ótrúlega gaman að bera mig saman við bestu leikmenn í heimi og ég naut þess allavega að spila í kvöld þó að úrslitin hafi ekki verið okkur í hag."
Þjóðirnar mættust í undankeppni fyrir HM 2027 og heimsækir Ísland evrópumeistara Englands í næstu umferð.
„Í seinni hálfleik áttum við mjög góða spilkafla og þorðum að halda í boltann, við getum tekið það sjálfstraust með okkur í næsta leik. Það verður líka erfiður leikur þar sem við munum ekki halda mikið í boltann en svo verðum við bara að nýta föstu leikatriðin, við vorum næstum því búin að skora í dag og svo bara reyna að halda markinu hreinu.
„Þetta eru leikmenn í heimsklassa þannig það verður erfitt að verjast gegn þeim. Við verðum að passa upp á langskotin hjá þeim, þær elska að skjóta utan vítateigs."
