Harvey Elliott: Slys og átti ekki að vera rautt

Hinn ungi Harvey Elliott segist vera algjörlega miður sín eftir það sem gerðist í gær gegn Leeds. Hann sé hinsvegar í skýjunum með þá væntumþykju og stuðning sem hann hefur fengið.

<i>„Þakkir til allra sem hafa haft samband eða sent kveðjur til mín og fjölskyldunnar. Það hefur mikið að segja. Einnig þakkir til allra á Elland Road sem gáfu mér stuðning um leið og þetta gerðist,"</i> segir Elliott.

Hann meiddist illa á ökkla eftir tæklingu frá Pascal Struijk sem fékk að líta rauða spjaldið. Í ummælakerfinu segir Elliott að þetta hafi verið algjört óhapp og að leikmaður Leeds hefði ekki átt að fá að líta rauða spjaldið.

<i>„Þetta var ekki honum að kenna. Þetta hefði ekki átt að vera rautt spjald en svona gerist í fótbolta. Ég mun 100% koma sterkari til baka,"</i> segir Elliott sem lætur engan bilbug á sér finna.

<i>„Ég hef gríðarlega öflugt stuðningsnet hjá Liverpool og saman munum við komast í gegnum þetta."</i>