Hræðileg mistök Tottenham - „Snemmbúin jólagjöf!“

Það er hálfleikur í þeim fjórum leikjum í ensku úrvalsdeildinni sem hófust klukkan 14. Þar á meðal er viðureign Nottingham Forest og Tottenham.

Þar leiðir Forest 1-0 eftir mark Callum Hudson-Odoi.

„Snemmbúin jólagjöf!" segir í lýsingu BBC en Forest fékk markið á silfurfati frá Tottenham.

Guglielmo Vicario, markvörður Tottenham, gerði hræðileg mistök með því að setja Archie Gray í erfiða stöðu undir pressu. Leikmaðurinn ungi tapaði boltanum til Ibrahim Sangare sem lagði upp fyrir Hudson-Odoi.

„Algjör martröð fyrir Tottenham sem geta bara sjálfum sér um kennt. Sending Guglielmo Vicario er afleit," segir Nick Mashiter, fréttamaður BBC.

Tottenham hefur gert fimm mistök sem hafa kostað mörk í ensku úrvalsdeildinni en aðeins botnlið Wolves (sjö) hafa gert fleiri.

Vicario, markvörður Tottenham, hefur fengið mikla gagnrýni á þessu tímabili enda gert slæm mistök. Stuðningsmenn Spurs bauluðu á hann eftir tap gegn Fulham nýlega.