Óli var eðlilega súr eftir tap gegn Val á heimavelli
„Ég er mjög fúll með að tapa þessum leik. Þetta var bara svipað og hinn leikurinn. Við sköpuðum bara ekki nógu mörg færi þó við höfum haft boltann meirihlutann af leiknum,“ sagði Ólafur Þór Guðbjörnsson, þjálfari Stjörnunnar, í samtali við Fótbolta.net eftir tap gegn Val fyrr í kvöld.
Lestu um leikinn: Stjarnan 1 - 2 Valur
„Þær spiluðu vörnina sína vel. Voru þéttar til baka og lágu fyrir framan teiginn sinn. Það skilaði þeim sigri og það verður að virða það.“
„Ég er súr með þennan endi og þetta víti sem er dæmt á okkur. Mér fannst það kolrangt en þeir dæma þetta og þeir læra vonandi af því. Það var hangið í Kim þarna löngu áður en að hún braut af sér en þannig er fótboltinn,“ sagði Óli vonsvikinn en óskaði Valskonum til hamingju með sigurinn.
Stjörnukonum hefur gengið illa eftir EM-fríið ef undan er skilinn bikarsigurinn á Val. Bæði Þór/KA og ÍBV hafa tapað stigum eftir hlé en Stjörnukonum hefur á sama tíma mistekist að vinna sína leiki og komast nær toppsætinu. Hvað veldur?
„Auðvitað höfum við ekki spilað nógu vel á síðasta þriðjungnum eða skapað okkur opin færi miðað við hvað við höfum boltann mikið í þessum leikjum. Það er eitthvað sem við þurfum að bæta,“ sagði Óli meðal annars en nánar er rætt við hann í sjónvarpinu hér að ofan.
Þar kemur Óli meðal annars inná breytingarnar sem hann gerði á byrjunarliðinu fyrir leikinn í kvöld, innáskiptingar í leiknum og komandi þátttöku Stjörnunnar í Evrópukeppninni.
Athugasemdir
