Fylkismenn björguðu sér í Árbænum
Fylkir 2 - 2 ÍBV
1-0 Elís Rafn Björnsson ('8 )
1-1 Tómas Bent Magnússon ('63 )
1-2 Sverrir Páll Hjaltested ('75 )
2-2 Þóroddur Víkingsson ('86 )
Lestu um leikinn
1-0 Elís Rafn Björnsson ('8 )
1-1 Tómas Bent Magnússon ('63 )
1-2 Sverrir Páll Hjaltested ('75 )
2-2 Þóroddur Víkingsson ('86 )
Lestu um leikinn
Fylkir og ÍBV gerðu 2-2 jafntefli í neðri hlutanum í Bestu deild karla í Árbæ í dag.
Elís Rafn Björnsson kom heimamönnum í 1-0 á 8. mínútu. Benedikt Daríus Garðarsson fann Elís, sem fékk að rekja boltann fyrir utan teiginn áður en hann hamraði boltanum neðst í hornið.
Ólafur Kristófer Helgason átti stórkostlega björgun með löppunum stuttu síðar og kom í veg fyrir að Eyjamenn myndu jafna leikinn.
Fylkismenn fóru með 1-0 forystu í hálfleik en Eyjamenn jöfnuðu á 63. mínútu er Tómas Bent Magnússon stangaði hornspyrnu Jóns Ingasonar í netið.
Sverrir Páll Hjaltested kom Eyjamönnum yfir tólf mínútum síðar eftir að Tómas Bent fann Sverri sem skoraði örugglega.
Þóroddur Víkingsson kom inn á í lið Fylkis á 85. mínútu og innan við mínútu síðar jafnaði hann metin í sinni fyrstu snertingu er hann skaut boltanum í slá og inn.
Mikilvægt stig hjá Fylkismönnum en svekkjandi fyrir Eyjamenn sem þurftu svo sannarlega á öllum stigunum að halda. ÍBV er samt sem áður komið upp fyrir Fram og í 10. sætið með 20 stig á meðan Fylkir er í 9. sæti með 22 stig.
Athugasemdir
