Valur vann 4-1 sigur á 5. deildarliðinu RB í kvöld í 32 liða úrslitum Mjólkurbikarsins. Leikurinn átti að vera frekar þæginlegur fyrir Val sem hann var svo sannarlega ekki. Valsmenn náðu forystunni á 20. mínútu en skömmu síðar jöfnuðu RB. Rétt fyrir hálfleik komust Valsmenn aftur yfir þegar Þorsteinn Emil Jónsson skoraði. Þannig stóðu leikar í hálfleik. Valsmenn gerðu þrefalda breytingu í hálfleik sem gjörbreytti leiknum. Adam Ægir, Haukur Páll og Siggi Lár komu inn á sem breytti leiknum. Valsmenn voru miklu betri í seinni hálfleik en þeir skoruðu síðan á 85. mínútu og 90. mínútu og leikar enduðu 4-1. Arnar Grétarsson kíkti í viðtal eftir leikinn.
Lestu um leikinn: Valur 4 - 1 RB
„Eins og oft vill vera í bikarnum þá var þetta bara basl. Við gerðum þetta að vísu dálítið erfitt fyrir okkur, við hefðum alveg getað skorað fleiri mörk. Við fengum tvö færi mjög snemma í leiknum, mjög fín færi, en þetta var bara basl. Þeir voru hrikalega flottir, hlupu allan tíman og voru að pressa okkur meira að segja á 80. mínútu í stöðunni 2-1 að mig minnir. Lykilatriðið er samt bara að vera í pottinum í næsta drætti og við gerðum það."
Valsmenn unnu leikinn vissulega og voru betri aðilinn en hvernig var frammistaðan í leiknum og breyttist hún eitthvað með skiptingunum í hálfleik?
„Við vorum með einn mann í byrjunarliðinu núna sem byrjaði í síðasta leik, hann Birki Heimis, þannig við vorum að gefa mörgum ungum leikmönnum séns sem er bara fínt. En það sem gerist oft þegar það eru gerðar breytingar að þá verður smá rót og þá bara verður það ekki eins. Þó svo að við létum boltann oft ganga að þá vorum við að spila honum alltof mikið til hliðar. Þeir fá aukinn kraft við þetta mark sem þeir skora þar sem við hefðum kannski átt að fylgja eftir markinu 1-0 og bæta við og klára leikinn. Þeir voru bara virkilega flottir og ég verð að hæla þeim."
Næsti leikur hjá Val er útileikur gegn Fram, verða einhverjir komnir til baka úr meiðslum?
„Það verður bara að koma í ljós. Það er nokkuð ljóst að það styttist í Elvar Freyr, en við verðum bara að skoða það á morgun og hinn."
Styttist eitthvað í Hólmar Örn?
„Það veðrur bara að koma í ljós."
Viðtalið má sjá í heild sinni hér í spilaranum fyrir ofan.
