Everton hefur ekki farið vel af stað í ensku úrvalsdeildinni í ár og ákvað Marco Silva að hrista upp í byrjunarliðinu fyrir leik dagsins gegn West Ham.

Gylfi Þór Sigurðsson var tekinn úr liðinu og Alex Iwobi spilaði í holunni í hans stað.

Sú lausn virtist henta Everton vel í dag þar sem liðið sýndi mikla yfirburði gegn slöku liði Hamranna.

Heimamönnum tókst þó aðeins að skora eitt mark í venjulegum leiktíma og það gerði Bernard eftir 17 mínútur. Hann fékk þá góða sendingu frá Theo Walcott, náði að losa sig við varnarmann með skemmtilegum snúningum og skoraði í nærhornið.

Gylfa var skipt inn á 87. mínútu og lét til sín taka, enda ekki vanur að sitja svo lengi á varamannabekk. Hann tvöfaldaði forystuna og innsiglaði sigurinn með stórkostlegu skoti utan teigs.

Hann gabbaði varnarmann gestanna, Jack Wilshere, upp úr skónum og smurði knettinum í netið. Hans fyrsta deildarmark á tímabilinu.

Everton hafði tapað fjórum úrvalsdeildarleikjum í röð og er komið upp í 10 stig með sigrinum. West Ham er áfram með 12 stig.