Elvar Geir Magnússon skrifar frá Slóveníu
,,Mér líst mjög vel á þetta. Þetta er mikilvægur leikur fyrir okkur. Sigur þýðir að við erum komnir í mjög góða stöðu," segir varnarmaðurinn Sölvi Geir Ottesen um leikinn gegn Slóveníu á morgun.
Sölvi Geir hefur verið úti í kuldanum hjá FC Kaupmannahöfn en hann bjóst þrátt fyrir það við því að vera í landsliðshópnum.
,,Já, ég bjóst alveg við að vera í þessum hóp. Ég tel mig vera nógu góðan til að vera í þessum hóp þó að ég sé ekki að spila hvern einasta leik í deildinni," sagði Sölvi en hann segist vera í fínu formi.
,,Ég var með í þremur æfingaleikjum fyrir mótið og síðan er ég búinn að spila tvo varaliðsleiki. Það er auðvitað ekki á sama tempói og í deildinni en ég fæ helling út úr því. Ég legg mig allan fram, ég vissi af þessum landsleik sem er að koma og gerði allt til að vera í toppstandi fyrir þennan leik."
Hér að ofan má sjá viðtalið í heild sinni.
