,,Mér fannst spilamennskan ekkert sérstök en það jákvæða var að við fengum þrjú stig og héldum markinu hreinu. En við getum verið sammála um að við höfum oft spilað betur," sagði Heimir Guðjónsson þjálfari FH eftir 1-0 sigur á Þór í Kaplakrika í kvöld.
,,Mér fannst menn í byrjun leiks vera að spara sig og hugsa um Evrópuleikinn. Það kann aldrei góðri lukku að stýra og þess vegna var þessi leikur eins erfiður og raun bar vitni."
Heimir sagði í viðtali í lok síðasta mánaðar að hann ætlaði að styrkja FH liðið í félagaskiptaglugganum sem nú er opinn. Nú eru nokkrir dagar eftir og enginn leikmaður kominn.
,,Ég reikna með að ég fái einhverja leikmenn. Við erum að skoða þau mál og ekkert í hendi ennþá," sagði Heimir.
,,Við þurfum að fá helst þrjá leikmenn, einn í vörnina, einn á miðjuna og einn í framlínuna," sagði Heimir en býst hann við að halda Birni Daníel út tímabilið á meðan áhugi Viking í Noregi er svo mikill?
,,Ég hef ekki hugmynd um það. Ég vinn ekki upp fyrir mig. Þú verður að spyrja aðra menn að því. Auðvitað viljum við hafa Björn Daníel út tímabilið og það væri frábært ef það gengi eftir því hann hefur spilað gríðarlega vel í sumar. Auðvitað yrði það áfall fyrir okkur ef hann myndi ekki klára tímabilið en við vonum að hann klári það."
