Sterkastur í 8. umferð - Gerir lítið úr besta leikmanni mótsins

Viktor Karl Einarsson er valinn Sterkasti leikmaður 8. umferðar í Bestu deildinni en valið var í Innkastinu. Viktor skoraði tvö mörk í 4-1 sigri Breiðabliks gegn Fram í Úlfarsárdalnum.

„Viktor Karl. Hiklaust. Skorar tvö og leggur upp. Heilt yfir mjög góður leikur hjá miðjumanninum í dag," skrifaði Sölvi Haraldsson, fréttamaður Fótbolta.net, sem valdi Viktor mann leiksins.

Fyrra mark hans var úr efstu hillu, hann var með Kyle McLagan varnarmann Fram í bakinu og vippaði boltanum yfir hann áður en hann kláraði í netið.

„Þetta var fáránlega vel gert. Hvernig hann pakkaði að mínu mati besta manni mótsins hingað til saman. Það er hægt að setja gæðastimpil á þetta mark. Hann gerir lítið úr besta leikmanni mótsins," sagði Baldvin Már Borgarsson í Innkastinu.

Viktor Karl hefur verið einn besti leikmaður Bestu deildarinnar á tímabilinu en þetta er í þriðja sinn sem hann er valinn í lið umferðarinnar. Breiðablik er þremur stigum á eftir toppliði Víkings.