Sigurbjörn Örn Hreiðarsson spilandi aðstoðarþjálfari Hauka var tiltölulega ánægður með stigið sem liðið fékk eftir 1-1 jafntefli gegn Leikni í kvöld. Hann viðurkenndi að Haukaliðið vildi alltaf fá þrjú stig á heimavelli en miðað við spilamennskuna var stigið sanngjarnt.
Lestu um leikinn: Haukar 1 - 1 Leiknir R.
,,Leiknisliðið er með hörku lið, þeir eru Reykjavíkurmeistarar og þetta var þeirra síðasta tækifæri til að komast í topp baráttuna. Þeir voru virkilega grimmir og erfiðir í dag. Stigið á sitt hvort liðið var sanngjarnt í dag," sagði Sigurbjörn sem átti þátt í marki Leiknis en hann átti að sjá um Brynjar Hlöðversson sem skoraði mark Leiknis eftir hornspyrnu.
,,Ég átti að taka Brynjar en hann skoraði og ég var sofandi í markinu," sagði Sigurbjörn en hann þurfti síðan að fara af velli eftir að Brynjar hafi farið aftan í hann á miðjum vellinum og fékk gult spjald að launum,
,,Þetta er gamall umsjónarnemandi minn og ég get ekkert fiktað í einkunnunum hans núna en það hefði verið sætt að hafa aðgang að þeim núna. Hann hefði fengið falleinkunn fyrir þetta, maður gerir ekki svona," sagði Bjössi sem talaði síðar í viðtalinu um baráttuna um toppsætin sem einungis þrjár umferðir eru eftir.
Viðtalið í heild sinni er í sjónvarpinu hér að ofan.
