Hansi Flick, þjálfari Barcelona á Spáni, er búinn að taka ákvörðun um það hver mun standa í markinu í þeim leikjum sem liðið á eftir í Meistaradeild Evrópu.
Marc-Andre ter Stegen hefur verið aðalmarkvörður Börsunga síðustu ár en hann sleit krossband í byrjun tímabils og neyddist spænska félagið til að sækja annan í hans stað.
Félagið leitaði til Wojciech Szczesny sem hafði lagt hanskana á hilluna nokkrum mánuðum áður og tók hann vel í það. Hann var á bekknum í fyrstu leikjunum eftir komu sína, en tók síðan sætið af Inaki Pena og hefur haldið því síðan.
Ter Stegen snéri aftur úr meiðslum í síðasta mánuði og var í hóp í fyrsta sinn í bikarúrslitaleiknum gegn Real Madrid um helgina, en hann mun hins vegar ekki spila í síðustu leikjum liðsins í Meistaradeildinni.
„Szczesny mun spila í Meistaradeildinni. Það er ákveðið. Hvað með Ter Stegen? Við munum sjá hvort við getum breytt einhverju í La Liga,“ sagði Flick á blaðamannafundi, en Barcelona mætir Inter í fyrri leik liðanna í undanúrslitum Meistaradeildarinnar í kvöld.
Pólski markvörðurinn hefur verið frábær frá því hann spilaði sinn fyrsta leik með Barcelona í janúar og reynst þeim afar traustur, svo traustur að félagið hefur ákveðið að framlengja samning hans út næsta tímabil.
Athugasemdir
