Magnús Gylfason.
,,Þetta var nokkuð öruggt fannst mér. Ég var nokkuð sáttur fótboltalega við leikinn í dag, við byrjuðum illa fyrsta korterið en eftir að við náðum að spila boltanum var ég mjög sáttur og þetta var nokkuð öruggt þó að þeir hafi náð þessu marki í lokin," sagði Magnús Gylfason þjálfari ÍBV eftir 3-2 sigur liðsins á Víkingi R. í Lengjubikarnum í gærkvöldi.
Abel Dhaira, markvörður Eyjamanna, meiddist undir lok leiksins en hann harkaði af sér og kláraði 90 mínútur þar sem liðið var ekki með varamarkvörð. ,,Varamarkvörðurinn fékk frí og Eyþór (Helgi Birgisson) var líklegastur í markið," sagði Magnús sem er ánægður með hópinn.
,,Leikmannahópurinn er að þéttast. Breiddin er eitt af því sem við ætluðum að vinna í fyrr þetta tímabil en hún er að verða góð. Það eru nokkrir leikmenn ennþá í burtu og frá vegna meiðsla en þetta týnist saman, það eru ennþá 5-6 vikur í mót og ég held að þetta verði allt klárt fyrir það."
Magnús útilokar þó ekki að Eyjamenn fái frekari liðsstyrk fyrir mót. ,,Við erum aðeins að horfa í kringum okkur og það gæti komið eitthvað á lokakaflanum," sagði Magnús við Fótbolta.net.
Hér að ofan má sjá viðtalið í heild sinni.
