Viktor skoraði fimm þrennur í Inkasso-deildinni í sumar og var valinn leikmaður tímabilsins.
Þróttur R. hefur samþykkt tilboð frá KA í framherjann VIktor Jónsson en þetta herma heimildir Fótbolta.net.
„Við samþykktum tilboð í hann í gær frá ónefndu Pepsi-deildarliði. Það félag fékk leyfi til að ræða við leikmanninn," sagði Ótthar Edvardsson, framkvæmdastjóri Þróttar, við Fótbolta.net í dag en hann vildi ekki staðfesta um hvaða félag ræðir.
Auk KA þá hefur Viktor verið orðaður við nýliða ÍA að undanförnu.
Viktor var valinn leikmaður ársins í Inkasso-deildinni í sumar en hann skoraði 22 mörk í 21 leik. Þar af skoraði hann fimm sinnum þrennu.
Hinn 24 ára gamli Viktor er uppalinn hjá Víkingi R. en hann á þrjú tímabil að baki með Þrótti í næstefstu deild.
Viktor var í liði ársins í Inkasso-deildinni 2015, 2017 og 2018 en árið 2016 spilaði hann með Víkingi í Pepsi-deildinni.
Athugasemdir
