Ítalía: Zaccagni mikilvægur fyrir Lazio

Mattia Zaccagni var aðalmaðurinn hjá Lazio sem vann Cagliari, 2-1, í Seríu A á Ítalíu í kvöld.

Gestirnir töldu sig hafa tekið forystuna á 16. mínútu er varnarmaður Cagliari sparkaði boltanum í Boulaye Dia, yfir markvörðinn og í netið, en markið var dæmt af þar sem boltinn fór af hendinni á Dia.

Lazio hélt áfram að sækja að marki Cagliari og kom fyrsta markið þegar lítið var eftir af hálfleiknum. Eseid Hysaj kom með fyrirgjöfina frá hægri og mætti Zaccagni á sprettinum inn í teig og þrumaði boltanum í markið.

Heimamenn jöfnuðu metin á 55. mínútu er Roberto Piccoli stangaði hornspyrnu Nicolas Viola í netið.

Lazio stjórnaði ferðinni eftir það og var það Valentin Castellanos sem skoraði sigurmarkið þegar hálftími var eftir er boltinn datt fyrir hann í teignum eftir skalla frá Zaccagni.

Rómarliðið gat bætt fleiri mörkum við en Elia Caprile varði frábærlega frá Zaccagni og Gustav Isaksen.

Lokatölur 2-1 fyrir Lazio sem situr í 4. sæti með 42 stig en Cagliari í 17. sæti og aðeins einu stigi fyrir ofan fallsæti.