Heimild: 433.is
Óhugnanlegt atvik átti sér stað í leik Augnabliks og KH í 3. deild karla í gær en Tómas Meyer, dómari leiksins, lá óvígur eftir að hafa fengið bolta í hausinn í miðjum leik. Þetta kemur fram í frétt 433.is.
Atvikið átti sér stað á 50. mínútu en hann fékk boltann í höfuð sitt eftir aukaspyrnu af stuttu færi og lá hann eftir á vellinum.
Leikmenn voru farnir að undirbúa endurlífgun á Tómasi áður en hann rankaði loks við sér og fór að anda sjálfur, en sjúkrabíll var kallaður til.
Tómas er með bestu dómurum í neðri deildunum á Íslandi og getið sér gott orð og hefur þá starfað í fjölmiðlum um árabil, meðal annars fyrir Fótbolta.net.
Hann var fluttur með sjúkrabíl af vellinum í Fagralundi og kemur fram í frétt 433.is að hann dvelur nú á spítala þar sem fylgst er með líðan hans.
KH vann leikinn, 2-1, en aðstoðardómarinn tók við flautunni og var þá ungur leikmaður Breiðabliks fenginn til að vera á línunni.
Við á Fótbolta.net óskum Tómasi skjóts bata!
Athugasemdir