Breiðablik og Valur áttust við í risaslag í efstu deild Lengjubikars kvenna og tóku Blikar forystuna á fjórtándu mínútu, þegar Birta Georgsdóttir kom boltanum í netið.

Valskonur svöruðu þó fyrir sig og skoraði Guðrún Elísabet Björgvinsdóttir tvennu til að snúa stöðunni við fyrir leikhlé.

Hin feykiöfluga Amanda Jacobsen Andradóttir setti þriðja mark Vals í upphafi síðari hálfleiks en heimakonur náðu að minnka muninn með marki frá Hrafnhildi Ásu Halldórsdóttur á 73. mínútu.

Nær komust Blikar ekki og urðu lokatölur 2-3 fyrir Val.

Liðin mættust í úrslitaleik um toppsæti riðilsins þar sem bæði lið áttu fullt hús stiga fyrir viðureign kvöldsins.

Valur lýkur því riðlakeppninni með 15 stig eftir 5 umferðir á meðan Blikar enda með 12 stig.