Landsliðsþjálfarinn Arnar Þór Viðarsson ræddi við Fótbolta.net í upphafi vikunnar. Þá sagðist hann vera að bíða eftir því að sjá hvaða leikmenn fara í úrslitakeppnina í Bandaríkjunum og hvaða lið verði í umspilsleikjum í Noregi.

„Þetta er svolítið óljóst og þess vegna er hópurinn sem við erum með núna á teikniborðinu aðeins stærri. Við fáum einhver svör eftir næstu helgi," sagði Arnar við Fótbolta.net á mánudag.

Einhverjir leikmenn munu ekki gefa kost á sér vegna meiðsla eða eru með eitthvað annað fyrirhugað þegar spilað verður í nóvember. Þá verður rúm vika síðan Íslandsmótið kláraðist.

Eitthvað hefur heyrst af leikmönnum sem eru í stóra hópnum hjá Arnari og ákvað undirritaður að setja saman lista út frá þeim upplýsingum. Fleiri leikmenn úr Bestu deildinni gætu verið á lista og það að vera á þessum lista þýðir ekki endilega að leikmaðurinn verði í hópnum.

Samkvæmt heimildum voru níu Blikar í fyrstu teikningu á landsliðshópnum en ólíklegt er að tveir þeirra, Anton Ari Einarsson og Gísli Eyjólfsson gefi kost á sér. Óskar Hrafn Þorvaldsson sagði þá í viðtali í Stúkunni að Jason Daði Svanþórsson þyrfti að fara í aðgerð eftir mót, spurning hvort hann spili fyrst eins og einn landsleik.

Hjá Víkingi heyrðist að sjö nöfn hafi verið á blaði en heyrst hefur að ólíklegt sé að þeir Erlingur Agnarsson, Ingvar Jónsson og Júlíus Magnússon gefi kost á sér. Hjá KA hafa svo fjórir verið nefndir, Sveinn Margeir Hauksson var einn þeirra en hann glímir við meiðsli og missir væntanlega af verkefninu.

Hjá Keflavík voru þrír á blaði og það kæmi á óvart ef einn leikmaður Vals yrði ekki í hópnum.

Besta deildin:
Breiðablik (9)
Anton Ari Einarsson
Dagur Dan Þórhallsson
Damir Muminovic
Gísli Eyjólfsson
Höskuldur Gunnlaugsson
Ísak Snær Þorvaldsson
Jason Daði Svanþórsson
Viktor Karl Einarsson
Viktor Örn Margeirsson

Víkingur (7):
Ari Sigurpálsson
Erlingur Agnarsson
Ingvar Jónsson
Júlíus Magnússon
Logi Tómasson
Viktor Örlygur Andrason
Danijel Dejan Djuric

KA (4):
Daníel Hafsteinsson
Ívar Örn Árnason
Sveinn Margeir Hauksson
Þorri Mar Þórisson

Keflavík (3):
Adam Ægir Pálsson
Rúnar Þór Sigurgeirsson
Sindri Kristinn Ólafsson

Valur (óstaðfest):
Frederik Schram

Leikmenn sem spila vestanhafs:
Guðlaugur Victor Pálsson - DC United (Engin úrslitakeppni)
Óttar Magnús Karlsson - Oakland Roots (Kemur í ljós um helgina hvort liðið fer í úrslitakeppni)
Róbert Orri Þorkelsson - CF Montreal (1. umferð í úrslitakeppni 17. október)
Þorleifur Úlfarsson - Houston Dynamo (Engin úrslitakeppni)

Leikmenn sem spila í norsku B-deildinni:
Bjarni Mark Antonsson - Start (fer líklega í umspil)
Hörður Ingi Gunnarsson - Sogndal (Þremur stigum frá umspilssæti þegar þrjár umferðir eru eftir)
Jónatan Ingi Jónsson - Sogndal
Valdimar Þór Ingimundarson - Sogndal

Al Arabi í Katar spilar í dag en svo eru ekki fleiri leikir á dagskrá fyrir HM. Það er spurning hvort Aron Einar Gunnarsson komi til greina í verkefnið.

Árni Vilhjálmsson er þá án félags og gæti komið til greina.