Lengjubikar kvenna: Valur valtaði yfir Þrótt - Fylkir lagði Þór/KA

Fylkir vann Þór/KA og Valur burstaði Þrótt í lokaleikjum A-deildarinnar í Lengjubikar kvenna í dag. Breiðablik lagði Tindastól og ÍBV kom til baka gegn Selfossi í hinum tveimur leikjunum.

Fylkir komst í 2-0 gegn Þór/KA á heimavelli með mörkum frá Þórdísi Elvu og Bryndísi Örnu áður en Hulda Ósk minnkaði muninn.

Á Origo vellinum gekk Valur frá Þrótti, heimakonur skoruðu átta mörk og skoraði Elín Metta þrjú þeirra. Anna Rakel skoraði tvö og þær Dóra María, Ída Marín og Olla skoruðu eitt mark hver.

Fylkir er með tíu stig líkt og Breiðablik á toppi riðils 2. Valur er með tólf stig, fullt hús stiga, eftir fjóra leiki í riðli 1.